السلام عليكم ورحمة الله وبركاته
من فترة .. طاحت أختكم في الله في المواقع الساسيه (( حقة ربعنا طبعاً ))
وكنت مُطلعه فقط .. يعني ماأشارك لا برأي ولا بموضوع
ولو اني أحياناً يالله أقضب عمري .. وأتعوذ من ابليس
وأسكر على طول الصفحه عشان ماأتهور
والسبب في تحفظي في عدم المشاركه معهم ..
أولاً .. اني توني (( فرخه )) .. ويستعصي علي فهم بعض المواضيع الساسيه أو اللي تحتاج الى شخص مطلع من زمان وفاهم اللعبه كلها..
ثانياً .. أخاف يلتبس علي شي وأرد أو أكتب موضوع .. همن يطلع العلم شي(ن) ثاني
ثالثاُ .. دفاشة وسوء أخلاق معظم المنتمين لهذه المواقع .. لدرجة أتفاجأ ببعض الردود اللي ماتدري وش توصفها به
رابعاً .. سهولة ادراجك في مسمياتهم وتصنيفهم لك .. ومن أدناة الدون بيلزخونك بأحد هذه المسميات
(( ليبرالي .. علماني .. )) وغيرها من المسميات اللي والله كل مافهمت واحد منها .. طلعولنا بواحد جديد .. ويالله روحي اقري عنه وافهمي وشهو
عاد مهيب زينه يلزخوني بتصنيف وأنفضح في العربان
خامساً .. صعوبة التفاهم معهم .. يعني حتى لو (( هايط عليك )) وقالك اختلافنا في الرأي لايفسد للود قضية .. استحالة يقبل رأيك
سادساً .. تطاولهم الكبير مو بس ع الحكام .. على المشائخ والعلماء
وهذا أكثر شي يحز بالنفس صراحه
المهم .. اني اعتفست ولا عاد أدري
وصراحه حامت تسبدي منهم .. وفي بالي أترك هالهبال حقهم وأشوف لي طريقه ثانيه أفهم من خلالها
العالم من حولي
بس المشكله وين ..؟؟
طبعاً خلو الجرايد على جنب .. معاد صرت ألحق أقراها من زود الشفاح اللي فيني
أقرا ثلاث جرايد <<<< يعني تجمع أكبر قدر من الأراء والمقالات
أبوي .. بالرغم من محاولاتي الحثيثه لاستدراجه لمناقشه هالمواضيع معي إلا أنه ينتبه لعمره في الاخير
هم(ن) يصيح علي ويقول خلي عنتس السياسه وقابلي دروستس أصرف
يعني معاد عندي طريقه .. أو وسيله
ووهالمواقع بالرغم من السلبيات اللي ذكرت فوق .. بعد لايمكن انك تعتمد رأي أو فكره بناءً على رأي شخص يمكن يكون غلطان أو له أهداف لاتظهر لك
برأيكم .. وش السواة ..؟؟ وش الدبرة يعني ..؟؟
مواقع النشر (المفضلة)