اما في غرفة كبيرة جمعتهم .. لطيفة جالسة جنب ابو سعود تكلمة .. لطيفه : و الله يا اخوي اني كنت بكلمك من زمان و ما جات حزتها..
ابو سعود بحمية لأختة : خير يا خيه محتاجة شيء.. تأمرين علي انتِ من غير لا تنتظرين حزة..
لطيفة : لا الله يخليكم لي.. ابو ثامر مو مقصر.. بس ابيك بموضوع..
ابو سعود : خير ان شاء الله..
لطيفه : خير باذن الله.. انت تدري اني بخطب لثامر..
ابو سعود : ايه.. الله يرزقة ببنت الحلال اللي تسعدة و ترضية..
لطيفه : و بنت الحلال اللي نبيها عندك.. نبي بنتك دانه لولدي ثامر..
ابو سعود : دانه بنتك يا خيه .. و ثامر حسبة ولدي.. بس خليني انشدها..
لطيفه : حقها يا اخوي.. بس انا خفت تكون زعلان عشان مها ردت احمد وما تعطينا..
ابو سعود : افااا و انا ولد ابوي.. الزواج قسمة و نصيب.. و دام ربي ماهو كاتبهم لبعض ما احد بيزوجهم غصب..
اما فيصل واقف مع ابوه برا.. يكلمة عشان نهى..
ابو عمر مبتسم : لهدرجة متشفق عليها..؟!
فيصل يقنع ابوه اللي من كلمه وهو يتريق عليه : يبه تكفى .. كلمة الحين..
ابو عمر : اكلمة ويش اقولة.. تبي تملك اقولة نملك لهم..
فيصل : ابي ملكة و زواج بيوم واحد..
ابو عمر : طيب يا ابوي ما حددت انت عشان يكون لي وجه اكلم اخوي..
فيصل : يبه قوله بنحدد العرس بعيد الأضحى.. يناسبكم..؟!
ابو عمر : يا ابوي اركد شوي ويش بلاك مشتط.. خلها يومين و نسير على عمك و نحدد العرس و نعطيهم المهر.. توك جاي يعني سبع سنين ما شفتها يوم لمحت زولها ما عدت تصبر..؟!
فيصل : يبه ما راح اصبر.. الحين كلمة تكفى قولة نبيه بالعيد.. تكفى يبه طلبتك..
ابو عمر : امري لله بكلمة عشانك..
فيصل يبوس راس ابوه : الله يديمك عز و ذخر لنا يارب..
ابو عمر : اسلقها علي بس.. تعداه و دخل الغرفة.. ترك ولدة واقف و مبتسم..بالرغم من الهوشة اللي بينه و بين نهى بس مبسوط ان ما سوتها الا من غيرتها عليه.. ما ينكر انه كان زعلان منها و يبي يعاتبها عشانها خلته يروح لحالة.. بس يوم شافها غيرانة عليه زعلة تبخر..
أسيل : الحين يعني لازم اشري فستان لولد اخوي يعني احم عمة العريس..
عبير : يعني متفشخرة.. و الله مره مقهورة من عساف فيه عريس صاحي يحدد عرسة بشهر..
أثير : اذا من زمان مخطوبين و بادين تجهيز عادي..
عبير : ما جهزنا شيء اول شيء بنفصل الفساتين و بعدين بنجهز جناح عساف و نشوف ترتيبات العرس..
جود : و الله من جد اخوكم قلق ويش ذا المفروض يحددة بعد سنة عشان يمدي الواحد يستوعب ان وراه عرس..
سها : و الله صدق انا مع اختي.. انا لا انخطبت بقول لخطيبي يحددة بعد سنتين..
أسيل : انخطبي انتِ بالاول بعدين نلقاك تنقين عليه يخليه بعد اسبوع..
سها صرخت بوسط الجلسة.. ما حست الا الكل ملتفت عليها مستغربين يحسبون فيها شيء.. حست شكلها غبي وما التفت عليهم عشان ما تلقى تهزيئة..
ام عبدالرحمن : ويش بلاك..؟!
سها من غير لا تناظرها : ولا شيء يمه..
ام عبدالرحمن : ويش منه صرختي..!؟
سها : و لا شيء..
ام عبدالرحمن : بلاه من قلة الحيا ما تختشين انتِ..؟!
عبير تهمس : اكلتيها..
سها : اسكتي لا احطها براسك..
ام عبدالرحمن : و الله يا سها ان عدتيها لا اقص هاللسان.. ما تختشن انتن جالسات تحكن بصوت عالي و تصرخن.. ما تقدرن احد ولا تحترمن..
سها : يمه و الله ما اعيدها .. هي طلعت لا شعورياً..
ابو عمر : حصل خير يمه.. خليهن على راحتهن..
ام عبدالرحمن : ما احد مقوي رووسهن الا انت..
ابو عمر ابتسم : ويش اسوي يمه .. ما اقدر على زعلهن..
ام عبدالرحمن : ايه خلهن يتمردن لين يقولون عيال مساعد ما عرفوا يربون بناتهم .. بكره يتزوجن و رجالهن يردونهم علينا..
ابو عمر : اعوذ بالله يمه.. بناتنا متربيات و سنعات و قص لسان اللي يقول غير هالحكي..
..
: تهقى بيقابلنا اليوم..
خالد يسكر ساعتة : لازم يقابلنا .. لو نروح له لدوامة مو شرط نقابلة بالدار..
ياسر : تصدق متوتر انا من هالحركة..
خالد : ويش اللي موترك..؟!
ياسر : خايف على ابوي ما يتحمل.. يعني له 28 سنة مقتنع ان ولده متوفي ودافنة بيدة.. فجأة يطلع ولده عايش..
خالد : مثل ما جاب ميار و تقبلها بيتقبل حاتم..
ياسر يجلس على طرف التسريحة و خالد واقف قدامة : ميار ابوي كان مقتنع انها عايشة لانها انخطفت منه .. و اعتقد تذكر ويش صار.. و كيف خالتي حنان تعبت.. مو مثل حاتم ابوي مقتنع بموتة..
خالد : انا ما انكر صعوبة الوضع .. بس ترى حاتم رجال يعني هذا يهون عند خطف ميار لانها بنت..
ياسر : معاك حق الرجال اهون من المرة.. بس يضل الموضوع صعب..
خالد : لازم تهونها عشان احنا بنصير بوجه المدفع.. انا صراحة ما اقدر اكلم خالتي..
ياسر : ولا انا.. اما اجيبها و اقولها ولدك طلع عايش.. اخاف يصير فيها شيء من فرحتها..
: ويش ذا اللي سمعتة..؟!
التفتوا عليها .. استغربت يوم سمعت اخر كلامهم.. لقت الباب مفتوح شوي و سمعت اخر حيكهم .. ناظروها الاثنين.. لين نطق ياسر : ويش فيك..؟!
وعد : كنت جاية ابي انشدكم ان كنتم بتروحون لعماد.. و سمعت اخر كلامكم.. ايش كنتم تقصدون..
خالد يلبس شماغة : ولا شيء.. اما عماد انا بروح له بس مو الحين.. عندي مشوار..
وعد : خالد ماني خبلة .. سمعتكم قلتوا اكلم خالتي و اقولها ولدك طلع عايش..؟! مين تقصدون..؟!
ياسر : من غير قرقر واجد.. عماد مو رايحين له الحين..
وعد : طيب علموني ويش تقصدون..؟!
ياسر : كل شيء بوقتة حلو.. الحين احنا عندنا مشوار..
وعد : ما انتم مريحين سبحان الله مشاوريكم صرتوا تقضونها مع بعض.. على فكرة ترى ما احد مصدق ان انتم الاثنين متفقين..
خالد : ليش ان شاء الله مو اخوان..؟!
وعد : امبلى بس العلم عند اختلاف شاسع بالشخصيات.. لو سعود وياسر و انت و احمد تمشي.. بس خالد وياسر..؟!!! مليون علامة استفهام..
خالد : المهم لا تطلعين أي مكان ابداً..
وعد : لا تخاف ماني طالعة.. بقي حبة و تربطوني بحبل والا تحطوني بقفص.. شوي و أكره نفسي..
ياسر : من خوفنا عليك..
وعد : ما يخالف ما اقول لا بس ترى جد شيء يطفش.. كل مره واحد ناط عندي.. حتى بابا بقي ينام عندي.. عشان يطمن.. و سعود بيصير لي بودي قارد يوقف على باب الغرفة.. و احمد كل ساعة يتصل يطمن.. اما وليد ومشعل يعني مو خايفين بس بيجون يسهرون معاي.. هذا غير عم بندر ويش ذا من جد مليت..
ياسر : ما تستاهلين يالشينة احد يحاتيك.. المهم كلمتي رجلك..؟!
وعد : لاا..
ياسر : وليش ان شاء الله..
وعد معقولة بقوله ما عندي رقمة.. رفعت شعرها اللي نازل على وجهها : كنت بتصل بس لما قلتوا انه سوا العملية وهو صاحي ترددت خفت يكون نايم .. فا سألت احمد عنه و قال بخير الحمدلله..
ياسر : زيـــن.. المهم كلمية ماهي زينة ما تحاكينة..
وعد : ان شاء الله..
سها : تقهر تقهر تقهر..
ام احمد : اعوذ بالله ويش بلاكن كل ما سمعت وحدة فيكن اليوم قالت انها مقهورة..
سها : مقهورة من الدكتورة الزفت.. قاهرتني حاطة نقرها من نقري..
جود : تلاقين انتِ معطيتها وجه..
سها : تستهبلين.. كل محاضرة تكلم علي.. ما ادري ويش انا مسوية كني سارقة حلالها..
منيره : غريبة كذا من الباب لطاقة..؟!
سها باستهزأ : تخيلي عاد من الباب لطاقة..
: السلام عليكم..
: وعليكم السلام..
ابو سعود : ندى ما نزلت..؟!
ام ندى : لا .. ليش انت طالبها..؟!
ابو سعود : ايه متى ناوية تجهز لعرسها!..؟!
ام ندى : و الله ما ادري ما حاكيتها..
ابو سعود : يصير خير..
جود : بس صدق شلون بتجهز وعد مو ع اساس بتسوي حفلة بعد اسبوعين..
ابو سعود : الا وينها..؟!
وعد : هنــا.. باست راسة و سلمت ع خالاتها و جلست..
جود : توني اسال مو انتِ بتسوي حفلة..؟!
وعد : ما ادري تصدقين ما كلمت عماد عليها.. بس مو حلوة اكلمة الحين خليه لا قام بالسلامة ان شاء الله.. الا صدق بابا ما انت رايح المستشفى تزورة..؟!
ابو سعود : الا ان شاء الله بعد شوي..
وعد : بروح معاك تكفى لا تقول لا..
ابو سعود : بس يا بابا..
قاطعتة وعد : ادري ويش بتقول بس صدق بشوفة بابا و الله ما اطول..
جود ناظرت نهى و سها لانهم يعرفون ان وعد ما تحب عماد .. او بالاصح شلون تبي تشوفة وهي تدري انه يحب مره.. المفروض تستغلها و تبعد عنه..
ابو سعود : امرنا لله..
ام سعود : لازم تأخذين شيء معاك يمه .. خلينا نسوي لك شوربة..
وعد : ما يحتاج خالة.. اكيد امه مو مقصرة..
ام سعود : انتِ غير و امه غير.. لازم تقومين برجلك ما يصير يطلع منك المنقود..
وعد : خالة لا تكبرين الموضوع .. اصلا عماد ما يحب الشوربة < قالتها عشان ما تبي تأخذ له شيء.. و الا هي اساساً ما تدري..
ام ندى : وجهك للحين اصفر يمه.. شكلك ما تأكلين..
وعد : امبلى اكلت..بس طبيعي كذا..
ابو سعود : لازم تستردين عافيتك يا بابا.. للحين شاحبة..
وعد ابتسمت باحراج : ان شاء الله بعد سبع شهور ونص..
ما احد استوعب.. غير نهى اللي تعرف لانها الوحيدة اللي كانت معاها وقت ما حللت وعد في المجمع الطبي اللي كان جنب المشغل اللي راحوا له عشان وعد تصبغ..
ابو سعود : ويــش..؟!
نهى : دادي و انا اقول انك ذكي.. وما احد يلحقك..
سها : ويش دخل الذكاء بالموضوع..
نهى : معقولة ما فهمتوا.. النتفة هاذي حامل..
تعلقت الابتسامة على وجيههم.. اما هي غطت وجهها بيدها : رجاءاً لا احد يعلق..
ابو سعود ابتسم : مبروك..
وعد باحراج من الموقف تحس شكلها غبي : الله يبارك فيك..
ام ندى : الله يقومك بالسلامة..
وعد : الله يسلمك..
: السلام عليكم..
باسوا راس ابوهم و وقفهم ناوين ع الطلعة مع بعض .. ياسر : خير سمعت مباركات..؟!
ام احمد : اختكم حامل ماشاء الله..
الاثنين ناظروها بصدمة : ويـــش..؟!!!!
خالد : صدق يعني بنصير خوال..؟!
ام احمد : ان شاء الله يا ابوي بس ادعوا لها تقوم بالسلامة..
ياسر : الله يقومك بالسلامة.. اهم شيء جيبي ولد يشبهني..
وعد : من زينك.. تبيني اعوف ولدي.. انت تزوج وجيب من يشبة لك..
ابو سعود : كويس فتحتي السيرة..
ياسر تضايق عرف ان الموضوع فيه مصيبة جاية .. ابو سعود يناظر ياسر : تراني كلمت عمك..
اتسعت عيونة بصدمة : ويـــش..؟!
ابو سعود : خطبت لك صبا..
ياسر بقهر مكبوت بس ما سلم منه صوتة : ليش يبه تبيني اظلمها .. انا ما ابيها كارهها شلون تبيني ارضى اخذها..
ابو سعود : صوتك لا يحتد عندي يا ياسر..؟!
ياسر يأخذ نفس يبي يكبت القهر اللي يزيد بداخلة : بس انت تعرفني يبه.. قايل لك ما ابيها ما ابيها..
وعد بقهر : على اساس هي الحين ميتة عليك..
ياسر بصدمة : نعـــم..؟!
وعد : انت ما تبي صبا لشيء فيها ماهو عاجبك ويش ما يكون هالشيء... تأكد ان صبا بعد تشوفك بنفس الطريقة.. يعني بصراحة احتمالية تمام هالزواج 10% ..
ياسر كتف يدينة و يناظر بوعد : ان شاء الله سالب 10 ..
ابو سعود : يـــاســـر..
ياسر : يبه تكفى لا تظلمني و تظلم البنية.. لو انت تعزها مثل بنتك ما خليتني اخذها..
ام احمد بفزعة : اعوذ بالله ليش ويش ينقصك عن الرجال..؟!
ياسر : يمه مو قصة نقص .. بس ماني متقبلها.. ما ابيها..
ابو سعود : و انا كلمت عمك.. بتعصيني..؟!
ياسر : يبه تكفى كل شيء يجي بالغصيبة الا الزواج..
ابو سعود بهدوء : و انا قلت كلمتي.. كانك ما تبيها دق على عمك قولة مالي لزمة ببنتك.. و أبوي بيجبرني عليها..
سكت ياسر و كأنه يقلب الفكرة براسة على قوتها الا ما يكون فيه طريقة تمنعة من الزواج و بنفس الوقت ما تزعل ابوه او عمة..
خالد بسرعة : لا يبه ياسر ما يسويها.. انت تفصل و احنا نلبس.. و ياسر بينتظر رد بنت عمي..
ياسر ناظر خالد.. و وده يسفل فيه .. ما بقي الا صبا من بد بنات خلق الله عشان تصير زوجتة.. : يبه اذا انت ملزم انا موافق اتزوج بس مو صبا.. صبا لا.. اسمها بس يجيب المرض..
ابو سعود : يــــاسر تراك تغلط على بنتي..
ياسر يغمض عيونة و يبوس راس ابوة : السموحة.. عن اذنكم مع السلامة و طلع..
اما خالد ناظرة : تأمرون على شيء..
ام احمد والوضع مو عاجبها : لا تأخر يا ابوي..
خالد : ان شاء الله يمه.. مع السلامة.. ام احمد تناظر زوجها بعد ما طلع خالد : ليش تخطبها وانت ما حاكيتة و اخذت بخاطرة..
ابو سعود : انتِ شايفة على صبا منقود..؟!
ام احمد : حاشا لله.. كاملة و الكامل الله..
ابو سعود : اجل ما يحتاج اخذ بخاطرة و زعلة اللي من غير سنع بكرة بيروح..
جود : و اذا ما يبيها يبه.. ما يصير تجبرهم..
نهى : على اساس صبا بتوافق على ياسر..؟!
جود : من جد بتكون غبية..
ابو سعود : خير ان شاء الله حجيات..؟! ويش عندكن من جديد..؟!
جود : احنا صادقين.. صبا لو تنفث عليها طارت.. اما ياسر لو تحطه قدام ذيب صرعة..
ام احمد : بسم الله عليه.. اذكري الله..
جود : لا اله الا الله .. عشان ما تقولون نضلتة.. بس صدق ما فيه توافق بين الاثنين..
ابو سعود : خليك بدراستك وما لك بالباقي..
جود : يعني لازم تجيب طاري المدرسة..؟! ليش كذا..
ابو سعود : ليش الغياب اليوم..؟!
جود : احم.. كنت تعبانة و دايخة..
ابو سعود : تراك ماخذة السكر عذر وصايرة تهملين دروسك..
جود : بقى تدرسني.. بابا تكفى انا اعرف مصلحة نفسي و اعرف ان الشهادة سلاح و التعليم مهم ومحاضراتك كلها حافظتها..
ابو سعود : ياليتة ينفع عاد.. وعـــد وعـــد..
انتبهت من سرحانها : هلاا..
ابو سعود : وين وصلتي..؟!
وعد ابتسمت : مو بعيد..
ابو سعود : بروح اشوف ندى و بعدين نروح لـعماد..
وعد اللي من جابت طاري الذيب جود سرحت فيه : ان شاء الله..
ابو سعود وقف : انتبهي لصحتك..
وعد : ان شاء الله..
سها : من قدك بتصير جد..
ابو سعود : يعني ماني جد الحين.. الله يسامحك نافية عيال خالد..
سها : بس هالمره من بنت .. و من هي كتكوتة بنشوفها مو مثل عيال خالد ماشاء الله..
ابو سعود يطلع الدرج : اهم شيء الصلاح.. و كلهم مثل بعضهم..
وعد : لا بابا عيالي غير..
نهى : على ويش غير بالله ..؟!
وعد : يكفي ان امهم وعد بنت ابراهيم..
منيره تكلم ام ندى : كيفك اليوم ان شاء الله احسن..
ام ندى : الحمدلله.. الأيام اللي فاتت ماكنت قادرة ارفع راسي من الخمول و التعب و اليوم كني احسن الحمدلله..
ام سعود : يا خية الهواجس ذابحتك.. خلينا نأخذك لشيخ يقرأ عليك..
ام ندى : ما فيني بلا يا ام سعود .. و الهواجس مونستني لين القى راعيها..
سها : و احنا يا ماما نبيك.. و الله نحتاجك يمنا..
ام ندى : و انا معاكم يمه.. التعب من اللي يحس به القلب و لا تشوفة العين..
ام سعود : بسم الله عليك.. خلي ابو سعود يوديك الشيخ..
ام ندى : لا مالي خاطر.. انا ما فيني شيء الحمدلله اقرأ وردي كل يوم و اقرأ على نفسي.. اللي فيني قلب متشفق على شوفة قطعة منه ما التقى فيها من صغره..
نهى قامت و جلست جنب ام ندى و حطت راسها على صدرها : تدرين يمه.. لا شفتك تهوجسين بأخوي اقول يمكن امي كانت كذا تهوجس فينا و احس اني احن لها.. بس لا ذكرت يوم قابلتها احس ببرود اتجاهها.. احس انها ماهي امي.. كل يوم اقول ليتني ما داومت ذاك اليوم و سمعت المره اللي علمتني.. كل يوم اقول ليتني ما عشت ذاك اليوم و بقيت بنتك و انتِ امي..
ام ندى تشد على نهى بحضنها : و انتِ بنتي يا نهى.. انتِ و وعد بناتي مثل ندى و سها.. و انا قلتها لكم من قبل انتم بناتي.. انا ربيتكم و ما راح اتنازل عن امومتي لكم..
وعد قامت و باست راسها : و أنا ما عرفت الا انتِ امي.. و لا ابي اعيش بشيء غير هذا.. انتِ امي..
ام ندى سحبت وعد و حضنت الثنتين مع بعض : الله يخليكم لي .. و يفرحني فيكم..
اما في غرفة ندى اللي كانت الكأبة هي محيطها .. فتح الباب بعد ما طقة كم مره.. دخل و شاف الظلام قدامة.. مد يده يتلمس الجدار و ضغط على الانوار و اشتغلت .. كانت منسدحة و اول ما اشتغلت الأنوار تضايقت و تغطت بفراشها من غير لا تنتبة مين شغلها.. اما هو تقدم و جلس عند راسها : مساء الخير..
اول ما سمعت صوتة فزت جالسة والنور يضايق عيونها : بابا.. مساء النور..
ابو سعود : كنتِ نايمة.؟!
ندى : لاا.. ما نمت..
ابو سعود : امس ما جاتك دانه وقالت لك اني ابيك..؟!
ندى : كنت نايمة..
ابو سعود : او تمثلين النوم مثل الحين..
سكتت ولا ردت عليه.. اما هو كمل : وبعدين يا ندى.. هذا و انا اللي كنت اقول انك اعقل بناتي.. و عقلك يوزن بلد.. و ما تطلعيني بالشينة..
ندى باستغراب : ليش ويش سويت..؟!
ابو سعود : ويش سويتي..؟! فيه بنت شهرها باقي له اقل من شهر و لا فكرت تنزل السوق.. او ابسطها تسأل عن مهرها..
ندى : وصلني.. جاتني رسالة ع جوالي من البنك..
ابو سعود : تبين تطلعين مقصرة..؟! و الحكي بيطولني انا و امك بعد..
ندى : لا ..
ابو سعود : بابا لا تخلين الشيطان يلعب براسك.. يكفيني امك تعبانة.. لا تخلين الشيطان يسيطر عليك و يتمكن منك ويخليك تصدقين اشياء مالها اساس..
ندى مالها حل اخر.. الرضوخ و الاستسلام هو الحل .. او بالاصح مو حل بس لازم تعيشة.. ما عندها شيء ثاني.. الدليل اللي كان بيدها صار بكومة زيالة من زمان.. و حتى لو رددت ابيات القصيدة اللي حافظتها عن ظهر قلب يمكن ما يصدقونها ابوها يشوف اللي فيها وسواس..
ابو سعود : ايش فيك سكتي..
ندى باست راسة : كل شيء بسوية عشانك.. عشان انت ابوي.. و لا ابي احد يحكي فيك بالمنقود..
ابو سعود باس راسها : هاذي بنتي اللي اعرفها..
..
بندر : ويش ذا اللي مشتريتة..؟!
اسيل ماسكة الفستان : مو حلوو..؟!
بندر : لحظة سؤال الفستان لمين..؟!
أسيل : لخالتي قماشة..؟! تستهبل لي انا..؟!
بندر : ما يلبق عليك.. يبي لك لون غير هذا هاذي الدرجة ما تليق عليك..
اسيل ناظرت اللون الفسفوري اللون هادي.. و اعجبها عشانه مميز : بس انا عاجبني..
بندر : بس ما يليق عليك.. المفروض تشوفين ويش يناسبك مو كذا خبط لزق تأخذين من طرف حتى لو مو حلو عليك..
أسيل تخصرت : و انت ويش يعرفك بالأشياء هاذي..؟! كلها سوالف بنات..
بندر : لا يا شيخة كن العيال ما يلبسون غير ابيض و اسود.. و بعدين ما يبي لها مفهومية.. المفروض انتِ بعد تهتمين لذا الأشياء مو تطلعين هبلة ما يصير اخت بندر و هبلة..
أسيل : من زين بندر عاد .. انا اخت مشاري و راكان..
بندر بهدوء عكس الخبال اللي من دقيقة معاها : يعني ما تبينا.. ولا عندك نية تتقبلينا..؟!
اسيل بعد تغيرت نبرتها من تغيرت نبرتة : اكذب عليك لو اقولك ايه احبكم مثل مشاري و راكان.. بس ما انكر احس ان في قلبي فرحة عشان عندي اخوان..
بندر : كويس يعني بيجي يوم و تحبينا.. بس ابي منك شيء انتِ و راكان..
أسيل : ان زين بنحكي بوسط المحل كذا..؟!
بندر : لااا يالله خذي اللي تبين عشان نشوف لك محل جوالات تشترين منه..
أسيل : طيب ما قلت لي أي واحد اخذ..
بندر : خذي الخمري.. بيطلع حلوو عليك..
أسيل : ما الوم خالتي لا شكت انك متزوج تعرف سوالف الحريم ماشاء الله..
..
حاتم بصدمة من اللي يسمعة : رجاءاً انا ما عندي استعداد اضيع وقتي بتفاهات..
ياسر اللي اساساً معصب من خطبتة ناوي يحطها بـحاتم.. : تفاهات..؟! اهلك امك و ابوك صاروا تفاهات..؟!
حاتم : لا تضحك على نفسك انا ما عندي اهل.. تفهم.. ما عندي.. انا مجرد نكرة .. نتج عن خطأ ما احد اعترف بارتكابة..
خالد بحدة : احتــــــــــــــرم نفسك..
حاتم : انتم ويش تقربون لها...؟!!
خالد : خالتي.. مرت ابوي يعني حسبة امي..
حاتم : كفوو و الله.. تربي عيال ضرتها..
ياسر : الزم حدودك.. احنا قلنا لك كل السالفة..
حاتم : ماهي داخلة مزاجي.. سبحان الله يعطوني ابوي جثة يقولون له هذا ولدك و يروح يدفنة ع اساس انه انا..؟! تلعبون على مين انتم..؟!
خالد : ويش مصلحتنا من الكذب..؟! لو عكست الادوار و انت اللي جاي تقولنا بنقول انت تلعب علينا.. بس احنا ويش مصلحتنا عندك..؟! استوعب ياخي و افتح مخك شوي.. احنا يالله لك الحمد ماعلينا قصور.. كل اللي نبيه ان تعب خالتي يروح.. خالتي اللي من 28 سنة وهي تهوجس فيك.. تعبانة من قلبها ومن اللي حولها ما احد مصدقها.. كلهم مقتنعين انهم صلوا على ولدها ودفنوة.. الا قلبها بعده ما اقتنع.. حاسة فيك تمشي على الارض اللي هي عليها.. حياتها اللي حاولت تمشيها الحين وقفت ولا تحس غير بالتعب.. ووقفت عندك انت وبس.. وما تفكر الا فيك.. ترى خالتي و ابوي ما ينلامون.. انت تربيت سنين طويلة على فكرة انك يتيم بدون اهل.. صعب ان بيوم وليلة يطلع لك ام و اب و اخوان.. بس هذا ما يعني انك تلوم اللي ماله ذنب.. صدقني المخطي بنحاسبة.. بس انت لا تزيد الخطأ و تتعب قلوب انهكها التعب..
حاتم اللي كان يسمع لخالد وهو يناظر فيه.. فعلاً مالهم مصلحة عنده عشان يكذبون عليه.. بس ما يبي يصدق.. ان عنده اهل.. لو طلع خطأ .. اللي اخطأ و دفن جثة لولد ماهو ولدة.. يخطي و يقول لواحد انت اخوي و هو ماهو اخوة.. ما يبي يمشي بطريق يكون مسدود بالنص.. ما يبي يتأمل بشيء تمناة من سنين ام و اب و اخوان و عيلة و جماعة و سند.. ما يبي يعيش دور من سابع المستحيلات يعيشة.. ما يدري..!! مشاعرة متضاربة.. او بالاصح كلها خوووف بس خوف مع المغامرة وهو انه يتأكد من كلامهم.. و خوووف انه يصدق و يحاول يتأكد .. يتأكد انه يتيم بدون عزوة..
ياسر : ويش قلت..؟!
حاتم : بشرط..
ياسر : اللي هو..؟!
حاتم : نسوي الـ dna و الا ما راح اقتنع باللي قلتوة..
ياسر : تم.. نسوي تحاليل ليش لا.. بس ان كنا اخوان من الاب يصير..؟!
حاتم : اذا كانوا الاخوان اشقاء يتطابقون بالنصفين بالجينات من الام و جينات من الاب.. و اذا مو اشقاء يتطابقون بنصف واحد.. يعني اذا انتم اخواني من ابوي.. ح نتطابق بجينات الأب..
ياسر : خلاص متى تبينا نسويها..؟!
حاتم : الحين نروح المستشفى و نحلل.. لانها تأخذ كم يوم النتيجة التحاليل صعبة ماهي سهلة..
خالد : مو مشكلة.. نروح نحلل.. و بعدين نمر على عماد..
ياسر : اوك..
..
تعبان ولا له خلق لأحد.. وده ينام.. بس مجاملهم و جالس معاهم..
ابو سعود : ما تشوف شر..
عماد : الشر ما يجيك يا عمي..
غازي : كيفك يا خالي ان شاء الله ما اخترعتي..!
وعد : لا الحمدلله.. عدت على خير..
ام عامر : الله سترها من عنده .. يالله لك الحمد..
: الحمدلله..
عامر : مو كل مره تسلم الجره يا عماد.. كم مره قايل لك لا تنزل السترة.. لو جاية الرصاصة بقلبك..؟!
عماد : لو ربي كاتب لي اموت من غير رصاص راح اموت..
ام عامر : بعيد الشر .. لا تطرون الموت الشر برا و بعيد.. خلاص لا عاد تطرونة..
سعود : متى بيطلعونك..؟!
عماد : ان شاء الله اليوم ما ابي اجلس..
ام عامر : ويش بلاك كنك بزر تبينا نحلف عليك و نقضبك السرير عشان تركد.. اقعد عندهم يمه لين نتطمن عليك..
عماد : ما فيني شيء يمه.. هذا انا بخير الحمدلله..
بعد طقتين ع الباب دخلت.. و لا انتبهت مين موجود : مساء الخيــر..
صدت وعد بوجهها عنها ودها تسفل فيها من قهرها .. اما انهار مبتسمة من وراء نقابها و لا عبرت ابو سعود و سعود الجالسين : الحمدلله ع سلامتك..
عماد بهدوء وعيونة على شرشفة الأبيض اللي مغطي رجولة : الله يسلمك..
انهار بحماس : احترت ويش اجيب لك .. بعد ما خوفتنا عليك.. بس ما لقيت احسن من التشكوليت اللي تحبها .. فتحت العلبة و مدتها عليه تبيه يأخذ..
وعد فزت و سحبت العلبة منها : الله شكلها يشهـــي.. اخذت العلبة و جلست مكانها تأكل.. استغربوا حركتها بس ما همها .. كل شيء يهون و لا عماد يأكل منها.. ظلت تاكل وهم يناظرونها .. ما كانت تعطي نفسها راحة ..
سعود همس لأختة اللي جالسة بينه و بين ابوه : وعـــد..؟!
وعد مستمرة تأكل وحدة وراء الثانية بتخلصها كلها عشان عماد ما يأكل منها.. بتنقهر لو اكل من اللي جايبتها انهاروة له على اساس انها تعرف ويش يحب مالت عليهم كلهم
عماد يناظرها مستغرب : بتعورك يالخبلة..
وعد : بطني و الا بطنك..؟!
عماد بحدة وهو يرفع ظهرة شوي : وعـــد ورب الكعبة ان ما تركتيها لا اخليك ترجعين اللي اكلتية..
انهار باستحقار لوعد: اعوذ بالله كنها ما قد شافت تشوكليت.. لا تخافين بجيب لك كراتين..
حست نفسها غبية جابت الحكي لنفسها .. من زين عماد عشان تاكل عشانة.. بعد ما خلصت نص الطبقة الاولى من وراء خشمها : ويش اسوي مشتهية تشوكليت من فترة.. و عماد يدري ليش مشتهيتة.. غطت العلبة و حطتها على الطاولة..
غازي ابتسم : ايه خلوها تخلصها .. ما عليه ياخالي بجيب لك منها كثير خذي راحتك..
ام عامر : ويش بلاكم تحكون بالالغاز..؟!
عماد : يمه وعد حامل..
ام عامر بفــرحة : صدق يمه.. يا ماشاء الله.. اكلي يمه ما عليك دامه من ولدنا..
عامر : مبروك يا بنتي..
وعد بدلع بعد ما هببت من دقيقتين : الله يبارك فيك..
عامر : مبروك يا ابو سعود..
ابو سعود بهدوء : ولدكم.. مبروك لكم و لنا..
عامر : الله يبارك فيك..
سعود باس راسها : ماني مصدق انتِ يالنتفة بتخلينا خوال..؟!
وعد : لا يا شيخ.. بكره تقول بشيل ولدك حامض على بوزك..
سعود : خليه يجي و ما راح اخليك تشوفينه بأخذة..
عماد : بعد عيني عينك تبي تسرق ولدي..؟!
سعود : اتونس فيه..
ام عامر : ان شاء الله بتجيك اللي تونسك.. ماله داعي تسرق عيال خلق الله..
ابتسم سعود باحراج وهو يدري انها تنغزة عشان شوق.. ما علق على كلامها..
اما انهار اللي ما شالت عيونها من الارض.. بيصير عنده بيبي منها.. من زوجتة.. عماد بيصير عنده بيبي يقول له بابا و ما راح يقول لي ماما.. ما عندنا طفل يجمعنا.. روح تولف بين روحي و روحة.. حست بدوخة من الصدمة.. بس ظلت واقفة مكانها .. لين نطقت بهمس : انا بشوف خالتي.. ودخلت للغرفة اللي موجودة فيها خالتها من دخل ابو سعود و سعود..
اما وعد ابتسمت .. صحيح ان كل شيء بحياتها ما جاء برضاها.. بس حست نفسها انتصرت.. و كأن فيه روح يتراهن عليها بالكسبان.. روح فيها من دم عماد هي فازت فيها.. حاسبة نفسها في معركة مع انهار حتى لو كانت انهار ما تعني لعماد شيء.. بس هي تحس غير كذا.. هي وعدته تجيب راسة و دامها بتحدي راح تسعى بكل الطرق انها تكسبة..
ابو سعود وقف : احنا نستأذن ما تشوف شر يا عماد..
عماد : الشر ما يجيك يا عمي.. مشكور ع الزيارة..
ابو سعود : واجبنا..
وقف سعود : خطاك الشر و انتبه على نفسك..
عماد : الشر ما يجيك..
اما وعد ما ودها تروح.. لسبب واحد ان انهار موجودة هنا.. ما تبيها تبقى مع عماد وهي ماهي فيه.. لكنها وقفت مقهورة وهي تلف طرحتها ..
عماد : اجلسي بنطلع كلنا للبيت..
وعد ما تنكر انها فرحت.. عشان ما تجلس تأكل بنفسها لمجرد الفكرة ان انهار عنده وما احد بيردها عن شيء.. بس ما راح توافق لسبب بسيط.. "عناد" تخاف يحسب نفسة مهم عندها خصوصاً بعد ما سحبت علبة التشوكليت من يد انهار عشان ما يأكل منها.. : بس تعبانة.. ودي ارتاح..
ام عامر تعدل لثمتها..: ايه يمه لا تتعبين عمرك ابد..
عماد بقهر و هو يصر على اسنانة : شوي و بنمشي ما راح نطول..
وعد : بس ظهري يعورني..
عماد ودة يسبها من قهره منها توها نقزت قدامة و سحبت التشكوليت ولا فكرت انها حامل و ظهرها يعورها زي ما تقول .. ومو غبي عشان يعرف انها ما تبيه يأكل منها.. بدليل ما خلته يأخذ ولا حبة و يوم خلصت غطتها و حطتها ع الطاولة الصغيرة قدامها مو عنده.. يعني كل السالفة عناد.. عماد مو غشيم يا وعد..
..
لا إله الا انت سبحانك اني كنت من الظالمين..
لا أحلل نقل الرواية دون ذكر اسمي..
هاشتاق الرواية #رواية_لو_سألتي_الورد ..
ضحكة قهر..
مواقع النشر (المفضلة)