قصيدة الغالي اللي مايبين غلاتك

بسم الله الرحمن الرحيم


الغالي اللي ما يبين غلاتك=خله وتلقى من يحبك ويغليك

والصاحب اللي ما يقدر سواتك=خله وتلقى الصاحب اللي يداريك

واخلاقك اخلاقك تراها مراتك=عند البشر صورة تبين مباديك

والطيب لا من صار اول صفاتك=ذكره ما بين الناس لا مت يحييك

وذكرك وبرك مع إقامة صلاتك=ثلاث عن كل المخاليق تغنيك

تسعد خفوقك في بقية حياتك=واتعيش في راحه من الهم تحميك

اعمال تشفع لك لياجا مماتك=اليا دخلت القبر والناس تبكيك

وفسقك وتبذيرك وتقصير ذاتك=ثلاثةٍ لا شك بالهم تشقيك

احرص وفكر كيف تكسب نجاتك=واتزيد بعمالٍ من النار تنجيك